Dita e parë e hapjes së dyerve të universiteteve të vendit nuk është një ditë e mirë për Shqipërinë dhe shqiptarët.

Nuk është një ditë e mirë, sepse këtë vit hyjnë në universitetet e vendit 15 përqind më pak studentë se një vit më parë.

Dhe, hyjnë në bankat e vendit, pothuajse gjysma e atyre që hyjnë në universitete në vitin 2012-2013.

Kështu e nisi deklaratën për mediat ditën e sotme, kryedemokrati Sali Berisha duke thënë se ka një rënie dramatike të numrit të studentëve në një kohë kur Shqipëria ka nevojë jetike për kapërcimin e prapambetjes së tmerrshme që trashëgoi nga e shkuara, për një numër në rritje të qytetarëve të saj të diplomuar në universitete.

Sipas tij, nuk është vetëm ulja e numrit të studentëve një problem madhor për vendin dhe arsimin e lartë universitar, por se një problem tjetër shumë i madh është situata ekonomike e studentëve në Shqipëri.

Studentët në Tiranë, nisin vitin e tyre universitar në qytetin e tretë me qira më të larta në Europë. Më të shtrenjta!

Ndërkohë, qeveria shqiptare nuk ka parashikuar qoftë dhe një qindarkë kompensimi për rritjen stratosferike të qirave të banimit.

Nuk ka parashikuar një qindarkë të vetme kompensim për rritjen stratosferike të ushqimeve dhe shërbimeve në qytetin e Tiranës.

Kështu, studentët përballen këtë vit njësoj si qytetarët me çmime 7-10 përqind më të shtrenjta për ushqimet se në vendet anëtare të BE.

Por, absurde dhe ndëshkuese janë për studentët, tarifat që duhet të paguajnë për regjistrimin në universitetet e vendit.

Këto tarifa janë disa herë më të larta në proporcion me rrogat se në të gjitha vendet e tjera të Europës.

Këto tarifat janë dhe nominalisht disa herë më të larta se në Gjermani, Austri, Francë, Greqi, Slloveni, Itali dhe vende të tjera.

Këto tarifa de facto bëjnë të papërballueshëm shkollimin e fëmijës së dytë apo të tretë për më shumë se 60 përqind të familjeve shqiptare.

Këto tarifa, së bashku me qiratë e larta dhe çmimet e ushqimeve, shndërrojnë universitetin në një mollë të ndaluar.

Berisha tha se solidarizohet me bojkotin e studentëve të mjekësisë, duke shtuar ky është shkatërrim i sistemit shëndetësor në të ardhmen.

Një akt tjetër i shëmtuar, totalitar, i pashembullt në Europë, është vendosja e detyrimeve ndaj studentëve të mjekësisë për të firmosur rikthimin e shpenzimeve nëse pas diplomimit, nuk pranojnë të punojnë në vendin e tyre.

Ky është akt totalitar, akt i cili nuk ekziston në asnjë vend tjetër.  Ky është akt shkatërrimtar për sistemin e shëndetësisë në Shqipëri.

Ky akt ka bërë që qindra e qindra studentë, ekselentë ndër të tjerë, t’u drejtohen universiteteve të Europës, për diplomim në fushën e mjekësisë.

Qindra e qindra të tjerë u janë drejtuar universiteteve private. De facto është shkatërrimi i Fakultetit të Mjekësisë dhe sistemit të shëndetësisë në të ardhmen.

Sot, studentët e mjekësisë kanë bojkotuar mësimin. Solidariteti im është i plotë me ta. U bëj thirrje mjekëve dhe infermierëve në mbarë vendin të solidarizohen me studentët.

Të mos harrojnë se sot janë ata, por nesër duhet të zëvendësohen nga ata që po ikin.

Ai u bëri thirrje studentëve të universiteteve të solidarizohen me studentët e mjekësisë, të mos pranohet vendimi absurd që synon të kontrollojë ëndrrën dhe vullnetin e tyre.

Berisha tha se nuk është zgjidhja kontrata, por rritja e rrogave.