Historiani dhe publicisti Jusuf Buxhovi tha në emisionin “Arnautistan” se nuk ka pasur një shtet mesjetar serb në Kosovë, sikurse pretendon historiografia serbomadhe.

“Problemi i shtetit mesjetar është problem i historiografisë. Është versioni që jep historiografia serbomadhe. Historiografia jonë e ka marrë versionin e historiografisë serbomadhe. Krejt historiografia serbe, por edhe kjo që është ndikuar prej saj, e lidhin Rashkën me shtet mesjetar serb.

Këtu është problemi më i madh. Rashka është entitet i pavarur feudal, si shumë entitete ilirikë, në rrethanat e bizantit. Në të gjitha dokumentet kurrkund nuk quhet mbretëri serbe. Stefan Dushani është i fundit i Rashkës. Stefan Dushani s’është identifikuar me shtetin mesjetar serb, ai është si një zhupani e pavarur, në kuadër të gjithë mozaikut të autonomive të pavarura ilirike”.

Buxhovi ka disa objeksione ndaj historianit Noel Malcolm, veprën e të cilit e konsideroi të dobishme politikisht, por evidenton edhe probleme.

 “Malcolmi pranon edhe një teori tjetër, që është ndër teoritë më anti-historike dhe reaksionare, pranon tezën e arnautashit. Sipas memorandumeve serbe është se kur ka ardhur Perandoria Osmane, një pjesë e madhe e serbëve janë kthyer në turq, dhe më pas janë kthyer në myslimanë dhe shqiptarë. Kjo teori s’pi ujë në asnjë konstelacion”.