Marina italiane nisi të dielën 49 emigrantë të cilët i kishte marrë në ujërat ndërkombëtare drejt qendrave të ngritura në Shqipëri, tha ministria e Brendshme, duke rifilluar një plan për të frenuar mbërritjet në det.

Qeveria e Giorgia Melonit ka ndërtuar dy qendra pritjeje në Shqipëri në Shëngjin dhe Gjadër, marrëveshja e parë e kësaj natyre që përfshin një vend të Bashkimit Evropian që i drejton emigrantët në një vend jo anëtar të BE-së, por qendrat kanë mbetur bosh që nga nëntori pasi u përballën me kundërshtimin e gjykatës italiane.

Anija e marinës Cassiopea me emigrantët në bord pritet të mbërrijë në portin shqiptar të Shëngjinit mëngjesin e së martës, njoftuan zyrtarët e portit.

Gjyqtarët italianë refuzuan të vërtetonin ndalimin e dy grupeve të para të emigrantëve në qendrat shqiptare, të ndërtuara sipas një marrëveshjeje kontestuese midis Romës dhe Tiranës.

Çështjet e tyre janë referuar në Gjykatën Evropiane të Drejtësisë, e cila më herët kishte vendosur se aplikantët për azil nuk mund t’i nënshtroheshin një procedure të shpejtë që mund të çonte në riatdhesim nëse vendi i tyre i origjinës nuk konsiderohej plotësisht i sigurt.

Seanca gjyqësore evropiane për këtë çështje është caktuar për 25 shkurt.

Qeveria e kryeministres italian Giorgia Meloni ishte zotuar të riaktivizonte dy qendrat në Shqipëri të cilat kanë mbetur “të fjetura” pas vendimeve të gjykatave italiane.

Qëndrimi i kryeministres u mbështet pjesërisht nga një vendim në fund të dhjetorit nga gjykata më e lartë e Italisë, e cila tha se gjyqtarët italianë nuk mund të zëvendësojnë politikën e qeverisë për të vendosur se cilat vende janë të sigurta për riatdhesimin e emigrantëve, kërkesat për azil të të cilëve refuzohen.

Vendimi i lejon gjykatat më të ulëta të marrin vendime të tilla rast pas rasti, pa përcaktimin e politikës së përgjithshme.

Italia ka caktuar 650 milionë euro për të drejtuar qendrat pritëse të emigrantëve gjatë pesë viteve. Ato u hapën në tetor gati për të pranuar deri në 3000 emigrantë meshkuj në muaj, të marrë nga roja bregdetare italiane në ujërat ndërkombëtare.

Grupet e të drejtave të njeriut dhe organizatat joqeveritare aktive në Mesdhe e kanë kritikuar marrëveshjen si një precedent të rrezikshëm që bie ndesh me ligjet ndërkombëtare.

Meloni ka theksuar vazhdimisht se planet për të përpunuar emigrantët jashtë kufijve të BE-së në Shqipëri, kishin marrë mbështetje të fortë nga liderë të tjerë evropianë.