Nga shenjtërimi i Nënë Terezës mbushen sot 8 vjet. 5 Shtatori, data kur Papa Françesku vendosi të shenjtërojë murgeshën katolike me origjinë shqiptare, përkon me ditën kur ajo, në vitin 1997, u nda nga jeta.

‘Një jetë në shërbim të të tjerëve’. Ky ishte misioni i shenjtores Nënë Tereza, të cilës Ati i Shenjtë i njohu mrekullitë e bëra në shërimin e një gruaje nga kanceri dhe shërimi i një personi tjetër në Brazil, i prekur gjithashtu nga tumori.

Për punën dhe kontributin e saj, veçanërisht me fëmijët në Kalkuta të Indisë, atje dhe ku ndërroi jetë në vitin 1997, Nënë Tereza u vlerësua me çmimin Nobel të Paqes.

Sot, puna e saj është një frymëzim në të gjithë botën për më shumë ndihmë ndaj të varfërve. 5 Shtatori, Dita e Shenjtërimit të Nënë Terezës, është shpallur festë zyrtare.

5 Shtatori i 2016-s shënoi në kalendarin Apostol Ditën e Shenjtores shqiptare, Nënë Tereza e Kalkutës.

Nënë Tereza ose Shenjt Tereza e Kalkutës lindi në Shkup në vitin 26 gusht 1910. Emri i saj i lindjes është Anjezë Gonxhe Bojaxhiu. Ajo vizitoi Shqipërinë për herë të parë në gusht të vitit 1989.

Në këtë ditë të shënuar, Nënë Tereza përkujtohet nga krerët më të lartë të shtetit dhe politikës. I pari që ndau një reagim ishte kryeministri Edi Rama, që e cilëson Nënë Terezën si gruaja e paqes në botë.

Mirëmëngjesi dhe në këtë ditë të shenjtërimit të gruas së paqes në botë, shqiptares Nënë Tereza, ju uroj një ditë të bukur.

Edhe Presidenti Begaj ka kujtuar këtë ditë të shënuar të shenjtërimit të Nënë Terezës të cilën e ka cilësuar si shembullin e fuqisë së shpirtit dhe besimit,

Sot kremtojmë ditën kushtuar bijës së shenjtë shqiptare, Nënë Terezës, shembull i fuqisë së shpirtit dhe besimit, me një jetë të kaluar në dedikim e shërbim ndaj të vuajturve.  Mësimet e saj mbeten frymëzim për çdo shqiptar dhe mbarë njerëzimin.