Biznesmeni dhe politikani Behgjet Pacolli ka reaguar për herë të parë pas zhurmës mediatike që bëri me futjen e tij në Shqipëri. Në një status në rrjetet sociale, Pacolli ka publikuar një foto ku shihet në ballkonin e apartamentit të tij në Tiranë, me pamje nga kryeqyteti shqiptar, dhe krahas saj shkruan edhe arsyen që e ka sjellë në Shqipëri.

Sipas Pacollit, vizita e tij në Tiranë nuk është bërë për asnjë motiv tjetër, e as nuk është strehuar nga kryeministri Edi Rama, por ka ardhur që të punojë në lidhje me projektin e rindërtimit të Thumanës, pas dëmeve të mëdha që pësoi ajo zonë nga tërmeti i 26-nëntorit.

Ndër rreshta, Pacolli i përgjigjet edhe Albin Kurtit, liderit të Vetëvendosjes, parti e cila ka hedhur akuza ndaj politikanit, që sipas tyre, për të mos u futur në karantinë si çdo qytetar tjetër, ka shkuar në Shqipëri. Biznesmeni i thotë Kurtit se e ka respektuar këtë të fundit, duke i hapur dyert e shtëpisë dhe e pyet: apo s’jam nikoqir i mirë? Ndërkohë më tej, shton se asnjë nga akuzat e Vetëvendosjes nuk janë të vërteta.

Reagimi i plotë

Me mendje dhe me zemër 24 orë në “lokacionin” tim të dashur, Kosovë, po ndjek me shqetësim, por dhe buzagaz satirik, telenovelat policore rreth meje, që më në fund panë heroin e ri, zotëri Kurtin. Ndërsa Kosova si mbarë bota, e prekur nga pandemia, pret prej tij mesazhe bashkimi, pajtimi, qetësie, moderimi, pret punë për çkapjen e shtetit dhe jo fjalë mediash sociale, ai bën sfida duelesh mesjetare. Pse zotëri Kurti? Ju kam pritur në shtëpinë time, ju kam hapur dyert, zemrën dhe gjithçka sipas traditës së shqiptarit. A nuk kam qenë nikoqir i mirë?

A nuk e kam votuar përkundër presioneve, qeverinë tuaj me shpresën për ndryshim? Por ju thashë: kujdes, historia nuk fillon me ju! Nuk kam kërkuar kurrgjë; por në vend të mirënjohjes, nuk kam pritur këto sulme të egra që më kujtojnë Shqipërinë e viteve 70, regjimit një partiak. Ju kam bërë tranzicion model të detyrës tek ju, dhe tek pasardhësi im në krye të Ministrisë së punëve të jashtme. Nuk kam votuar rrëzimin e qeverisë tuaj. Nga cilat modele ideologjike vjen kjo egërsi ndaj meje? Ç’është ky Xhelali, sinonim i xhandarit personal të kryeministrit në letërsinë komuniste, që shkel ligj dhe kushtetutë e që më kërcënoka mua, ndërsa jam duke përkryer projektin e rindërtimit të Thumanës nga tërmeti, në banesën time? Ç’janë këta policë të mendimit, këta luogotenentë marksistë që kërcënojnë dhe kryeministrin e Shqipërisë se më strehoka mua? Mua që me votën time mund të votuam qeverinë e pasardhësit të zotëri Kurtit?

Kam dhimbje të madhe se stili juaj i të bërit politikë, po dehumanizon brezin e ri të Kosovës, po e merr peng atë, rininë, ëndrrat e saj. Shikoni sa egërsi, sa shpërfytyrim ka në mesazhet e të rinjve mbështetës tuajët në mediat sociale, sipas modeleve të shoqërive të egra aziatike, dhe të Partisë së Antiamerikanëve që përfshin dhe tajkonë mediatikë, me themel mu në trashëgiminë titiste apo enveriste të shoqërisë sonë. E di që xhandarët tuaj të mendimit do ma përmendnin Jelcinin, i cili ishte miku më i madh i Presidentit Klinton, çliruesit tonë. Bashkë kanë vendosur për çdo hap për Kosovën, dhe unë jam dëshmitar i këtij bashkëpunimi. Sigurisht Kosova nuk është në kufi të Meksikës, prej ku SHBA-të vendosën të bombardonin Serbinë, duke na çliruar si popull dhe duke ju nnxjerrë juve nga burgu. Por nuk është as në pjesë të caktuara të Azisë, prej nga duket se vjen kultura e egër e linçimit, e mendimit uniform dhe pa ngjyrë, e njerëzve të veshur njëlloj brenda dhe jashtë! Zotëri Kurti, do ikni dhe do vini në pushtet, sepse ky është ligji i pluralizmit, i rotacionit. Lini gjurmët tuaja në historinë moderne të Kosovës dhe kombit tonë duke ndërtuar dhe jo duke shkatërruar; duke nderuar njeriun, dhe jo duke e sulmuar atë; me mirënjohje dhe jo me agresivitet; duke bashkuar dhe jo duke ndarë. Mos vallë ju është korruptuar arsyeja juaj filozofike prej peshës së pushtetit? Mos rendni pas shumicës së verbër të cilës po ja shpëlani trurin, me mjete të paligjshme, por kërkoni aprovimin e pak-ëve, pa i numëruar, por duke i pëshuar ata – si ju thotë një filozof i dashur për ju.

Para dy ditësh, politikani Behgjet Pacolli kërkoi që të hynte në Prishtinë, por pa iu nënshtruar rregullit për të qëndruar 14 ditë në karantinën e ngritur tek Qendra e Studentëve. Autoritetet kosovare ia refuzuan kërkesën Pacollit, duke thënë se rregullat e karantinimit për këdo që futet në Kosovë nga jashtë janë të njëjta.

Qeveria shqiptare u tregua më bujare, duke e lejuar që të hyjë dhe të shkojë direkt e në shtëpinë e tij!