Parlamenti Evropian ka miratuar me 529 pro, 45 kundër dhe 14 abstenime raportin për t’i dhënë Ukrainës dhe Moldavisë statusin e vendit kandidat.

Deputetët shprehen “në kontekstin e luftës brutale ruse të agresionit kundër Ukrainës, kjo zgjedhje do të tregonte lidership, vendosmëri dhe largpamësi”.

Ata shtojnë “se nuk ka procedurë të përshpejtuar për anëtarësimin në BE” dhe se ky mbetet një proces bazuar ne meritë. Lëvizjet e fundit të Brukselit kanë për synim të rrisin moralin e Ukrainës që po përballet në beteja të ashpra me forcat ruse në Lindje të vendit.

Edhe pse miratimi i kërkesës së qeverisë së Kievit nga udhëheqësit e BE-së që takohen në Bruksel është vetëm fillimi i atij që do të jetë një proces shumëvjeçar, ai nënkupton një ndryshim të madh gjeopolitik dhe do të irritojë Rusinë, raporton “Reuters”.