Presidenti amerikan Joe Biden firmosi dy ditë më parë për bllokimin e pasurive dhe pezullimin e hyrjes në Shtetet e Bashkuara të personave që kontribuojnë në destabilizimin e Ballkanit Perëndimor, ku për herë të parë u përfshi edhe Shqipëria.

Gazetaria e Zërit të Amerikës, Menada Zaimi, në një lidhje me Skype nga Uashingtoni, për studion e lajmeve në MCN TV sqaroi se urdhri ka si qëllim parandalimin e korrupsionit brenda dhe jashtë vendit, dhe se fillesat e këtij urdhri e kanë zanafillën që në vitin 2001 asokohe nga George Ë Bush.

Përmes një memorandumi të Biden ai tha administrata do të tërheqë vëmendjen për mirëqeverisje, për të parandaluar korrupsionin brenda dhe jashtë vendit. Urdhri është vazhdim i urdhrit të vitit 2001. Urdhri fillestar i firmosur asokohe nga George W Bush erdhi si rezultat i kërcënimeve për stabilitetin në rajon. Me urdhrin e ri përfshihet tashmë dhe Shqipëria dhe ata që janë të përfshirë drejtpërdrejt apo indirekt që minojnë proceset demokratike në akte madhore korrupsioni dhe jo vetëm zyrtarë do të jenë subjekt i këtij urdhri. Siç tha Blinken përfshirja e Shqipërisë në këtë urdhër është për të garantuar një efikasitet më të madh për të luftuar korrupsionin.

E pyetur nëse ka një listë persona  SHBA që do të shpallen non grata, Zaimi deklaroi se, “Shtëpia e Bardhë thotë se do të vazhdojnë listën e individëve subjekt të këtij urdhri. Praktikisht me firmosjen e këtij urdhri janë hedhur bazat ligjore për të vepruar. Siç ka thënë Biden priten veprime konkrete por mbetet të shohim përditësimin e listës. Subjekti i urdhrit nuk do jetë i lidhur vetëm me zyrtarë. Këta persona që konsiderohen subjekt i këtij ligji, të gjitha këto prona do të bllokohen nuk do të lejohen të shiten apo transferohen. Pronat mund të jenë në posedim edhe të shtetasve amerikanë. Do të punohet për të identifikuar të cilat kanë një burim të dyshimtë”.

Në fund Zaimi tha se urdhri do zbatohet vetëm brenda SHBA-ve, por siç ajo theksoi duhet të mos harrojmë që implikimet potenciale të këtij urdhri do të thotë që sistemi financiar nuk do të shërbejë më si strehë e këtyre parave me prejardhje të dyshimtë.